கைது செய்யும் நடைமுறைகள் போலீசாருக்கு டி.ஜி.பி., உத்தரவு
*பதிவு செய்த நாள்: பிப் 05,2019*
*சென்னை: ஏழு ஆண்டுகள் மற்றும் அதற்கு குறைவான சிறை தண்டனை கிடைக்கும் வகையிலான குற்றங்களில் ஈடுபட்டோர் மீது, எடுக்க வேண்டிய நடவடிக்கைகள் குறித்து, போலீசாருக்கு, டி.ஜி.பி., - ராஜேந்திரன் சுற்றறிக்கை அனுப்பி உள்ளார்.அதன் விபரம்: இந்திய குற்றவியல் நடைமுறை சட்டம் - 41, பிரிவு, 'ஏ'வின்படி, குற்றம் செய்த ஒருவருக்கு, ஏழு ஆண்டுகள் அல்லது அதற்கு குறைவான சிறை தண்டனை கிடைக்கும் வகையில்,* *வழக்குப் பதிவு செய்யப்படுகிறது. இந்த பிரிவின் கீழ் வழக்குப்பதிவு செய்யும் போது, அவரை கைது செய்ய வேண்டிய அவசியம் இல்லை தேவைப்படும் போது, தன் முன்பாகவோ அல்லது வேறு இடத்தில் உள்ள போலீஸ் அதிகாரி முன்னரோ ஆஜராக வேண்டும் என, குற்றம் சாட்டப்பட்டோருக்கு, அறிக்கை அனுப்ப வேண்டும். இந்த அறிக்கையை, வழக்கு பதிவான இரண்டு வாரத்திற்குள் நீதிமன்றத்திற்கும் அனுப்ப வேண்டும் குற்றம் சாட்டப்பட்ட நபர், நெறிமுறைகளை கடைப்பிடிக்க தவறினாலோ அல்லது தன்னை அடையாளப்படுத்த விரும்பாவிட்டாலோ, நீதிமன்றம் பிறப்பிக்கும்* *உத்தரவை பொறுத்து, அவரை கைது செய்யலாம் குற்றம் சாட்டப்பட்டவர், விசாரணைக்கு ஆஜராக முடியாத சூழல் இருந்தால், அதற்கான காரணத்துடன், நான்கு நாட்களுக்குள் மாற்று நேரம் வழங்கும்படி, விசாரணை அதிகாரிக்கு, எழுத்துப்பூர்வமாக தெரிவிக்க வேண்டும் நியாயமான காரணம் அல்ல என, விசாரணை அதிகாரி கருதினால், குற்றம் சாட்டப்பட்ட நபர்,* *கட்டாயம் ஆஜராக வேண்டும் என, அறிவுறுத்தலாம் குற்றவியல் நடைமுறை சட்டம் - 41, பிரிவு, 'ஏ'வின்படி, விசாரணை அதிகாரியான போலீசார், செயல்பட தவறினால், அவர்கள் மீது துறை ரீதியாக நடவடிக்கை எடுக்கப்படும். மேலும்,* *உச்ச நீதிமன்ற அவமதிப்பு நடவடிக்கைக்கும் ஆளாக நேரிடும்.இவ்வாறு, சுற்றறிக்கையில் கூறப்பட்டுள்ளது.இந்த சுற்றறிக்கையுடன், அறிவிக்கை அனுப்புவதற்கான மாதிரி படிவங்கள், போலீஸ் கமிஷனர்கள் மற்றும் மாவட்ட, எஸ்.பி.,க்களுக்கு அனுப்பி வைக்கப்பட்டு உள்ளன.*
Comments
Post a Comment